尋 常 東 西

也 有 不 平 凡 故 事

真 的 大 公 雞 

     雞是良禽, 有五德. 文, 武, 勇, 仁, 信. 頭戴冠者, 文也. 足搏距者, 武也. 敵在前敢鬥者, 勇也. 見食相呼者, 仁也. 守夜不失時者, 信也.

 【 雞公仔  尾彎彎】 

      記得好耐以前喺街邊食車仔麵,  就係用 D 大大隻嘅雞公碗. 有 D 人又叫佢做公雞碗. 公雞嘅造形及圖案,  係中國傳統瓷繪藝術嘅經典版本.  晉代已出現著名嘅雞頭壺, 明代有天價嘅鬥彩雞缸杯,  清代嘅雞紋廣彩暢銷國外,  民國雞公碗幾乎餐餐見面. 估唔到呢隻大公雞,  依家仲成為懷舊飲食文化嘅爆鏡道具. 

      近年故事館所藏雞公碗,  頻頻見報,  電台又講,  仲上埋電視添. 四五歲嘅 B B,  七八十嘅公公婆婆,  一見到雞公碗就開心到不得了 ! 點解咁有魅力 ?  就連專家都講唔清 ! 

      清末民初, 《 雞公碗 》已在潮汕地區生產, 由於畫面大紅大綠, 喜氣洋洋, 深受當地普羅大眾喜愛, 並大量出口到東南亞及香港添.  新界嘅客家人就叫佢做【 雞公缽 】.
 
      大家睇吓公雞左右兩邊有 D 乜 ?  閩南人對《 雞 》的發音為《 家 》,  右邊好大塊葉嘅, 係蕉樹, 咁就係《 興家成大業 》喇 !  加上呢隻又係公雞,  晨雞初鳴,  左邊係牡丹,  花之富貴者也, 咁即係《 功名富貴 》囉 !

      原來雞公碗嘅花樣都咁有意思,  呢 D 就係中國傳統嘅瓷繪藝術,  叫做《 圖必有意   意必吉祥 》.